काठमाण्डौ ३ कार्तिक ।
नेकपा एमाले र नेकपा माओवादी केन्द्रका १ सय ५७ सांसदले अख्तियार प्रमुख लोकमानसिंह कार्की्विरुद्ध संसदमा महाअभियोग प्रस्ताव दर्ता गराएका छन् । माओवादी केन्दका नेता प्रस्तावक र एमाले प्रमुख सचेतकको समर्थनमा बुधबार साँझ पौने ५ बजे महाअभियोग प्रस्ताव दर्ता गराएका छन् ।
एमाले वरिष्ठ नेता झलनाथ खनाल, नेता माधव नेपालसहितले प्रस्तावमा हस्ताक्षर गरेका एमाले प्रमुख सचेतक भानुभक्त ढकालले जानकारी दिनुभयो । माओवादीबाट ऊर्जामन्त्री जनार्दन शर्मासहित ४० जना सांसदले हस्ताक्षर गरेका छन् । एमाले–माओवादीका नेताहरुले महाअभियोगबारे कांग्रेससँग पनि प्रारम्भिक छलफल गरेका छन् ।
संसद्मा महाअभियोग पत्र दर्ता भएपछि अख्तियार दुरुपयोग अनुसन्धान अयोगका प्रमुख आयुक्त लोकमान सिंह कार्कीको पद स्वतस् निलम्बनमा परेको पत्र संसद्ले राष्ट्रपति, प्रधानमन्त्री, अख्तियार र संवैधानिक परिषद्मा पठाएको छ।
संसद सचिवालयले यस्तो पत्र पठाएको जानकारी सभामुखका प्रेस सल्लाहकार बबिन शर्माले दिए। संसद सचिवालयले पठाएको पत्रमा संसद्मा दर्ता भएको महाअभियोगको प्रस्तावको टुंगो नलाग्दासम्म प्रमुख आयुक्तको हैसियतमा काम गर्न वा नगराउन भनिएको छ । कार्की अब कार्यलय गएर कुनै पनि काम गर्न नपाउने भएका छन्।
संविधानमा महाअभियोग प्रस्ताव दर्ता भएपछि यसको टुंगो नलागेसम्म सम्बन्धित पदाधिकारीले काम गर्न नपाउने वा भूमिका निलम्बित हुने प्रावधान छ ।
संसद्मा तत्काल कायम रहेका सम्पूर्ण सदस्य संख्याको कम्तीमा दुई तिहाइ बहुमतबाट पारित भएमा सम्बन्धित व्यक्ति पदबाट मुक्त हुने प्रावधान छ।
