काठमाडौं, ३ कार्तिक । डिफेन्डिङ च्याम्पियन रियल मड्रिडले च्याम्पियन्स लिगको समूह चरणमा दोस्रो जित दर्ता गरेको छ ।
गएराति भएको खेलमा मड्रिडले लेगिया वार्सामाथि ५–१ को फराकिलो जित निकालेको हो ।
रियलको जितमा ग्यारेथ बेल, मार्को एसेनसिओ, लुकास भाजक्वेज र अल्भारो मोराटाले एक एक गोल गरे । यस्तै पोलिस क्लब लेगिया वार्साका थोमस जोड्लोविएकले आत्मघाती गोल उपहार दिए । लेगिवा वार्साका लागि मिरोस्लाव राडोविचले शान्त्वना गोल गरे ।
यसअघिको खेलमा रियल मड्रिड बोरुसिया डर्टमुण्डसँग २–२ को बराबरीमा रोकिएको थियो भने समूहको पहिलो खेलमा स्पोर्टिङलाई २–१ ले हराएको थियो ।
समूह एफमा रहेको रियल मड्रिडको तीन खेलबाट सात अंक भएको छ । गएराति भएको अर्काे खेलमा स्पोर्टिङ लिस्बोनलाई २–१ ले हराएको बोरुसिया डर्टमुण्ड तीन खेलबाट सात अंक जोड्दै समूहको शीर्ष स्थानमा छ । बोरुसिया रियल मड्रिड भन्दा गोल अन्तरमा अघि रहेको छ ।
