काठमाण्डौ ,२ कार्तिक ।
इंग्लिस प्रिमियर लिग अन्तर्गतको आज बिहान सम्पन्न खेलमा म्यानचेस्टर युनाइटेड र लिभरपुल गोल रहित बराबरीमा रोकिएका छन् ।
लिभरपुलको मैदानमा भएको खेलमा दुवै क्लबले गोल गर्न पाएको राम्रा अवसर गुमाएका थिए । बराबरीपछि लिभरपुलले शीर्ष स्थानको म्यानचेस्टर सिटीसँग अंक बराबरी गर्ने मौका गुमाएको छ ।
शीर्ष दुई स्थानका सिटी र आर्सनल भन्दा दुई अंकले पछि रहेको लिभरपुल ८ खेलबाट १७ अंकसहित चौथो स्थानमा छ । १४ अंक रहेको युनाइटेड सातौं स्थानमा छ ।
पछिल्लो समय निकै फर्ममा रहेको लिभरपुलसँगको खेलमा म्यानचेस्टर युनाइटेडका प्रशिक्षक जोसे मोरिन्होको रणनीति निकै उपयोगी बन्यो ।
म्यानचेस्टर युनाइटेडले यो खेलमा लिभरपुलले यो सिजन गर्दै आएको स्तरको प्रदर्शन गर्ने मौका नै दिएन ।
मोरिन्होले खेललाई अट्याकिङ भन्दा पनि लिभरपुललाई अवसर नदिने रणनीतिमा खेलाडीलाई परिचालित गरेका थिए ।
दोस्रो हाफमा लिभरपुलले गोल गर्ने राम्रा दुई मौका पाएपनि म्यानचेस्टरका गोलरक्षक डेविड डि जियाले सुन्दर बचाउ गरे ।
जियाले एमरी क्यान र फिलिपे कोन्टिन्होको प्रहार जोगाएका हुन् । युनाइटेडले पनि दोस्रो हाफमा नै गोल गर्ने मौका बनाएको थियो ।
पउल पोग्बाको क्रसमा जाल्टन इब्राहिमोविचले प्रहार गरेको बल लक्ष्यमा भने पुग्न सकेन ।
