एजेन्सी, असोज २८ । विश्व फुटवल महासंघ फिफाले भ्रष्टाचार काण्डपछि उत्पन्न संकट अन्त्यका लागि नयाँ कार्ययोजना सार्वजनिक गरेको छ ।
फिफाले भ्रष्टाचार काण्डपछिको अवस्था र भविष्यको प्रमुख उद्देश्य समेटिएको योजना ल्याएको छ । यसलाई ‘फिफा २.०’ नाम दिइएको छ ।
भ्रष्टाचारपछि गिरेको साख जोगाउनका लागि सबै पक्षको विश्वास लिएर फिफाले नयाँ योजना सार्वजनिक गरेको जानकारी दिएको छ ।
फिफा अध्यक्ष जानी इन्फान्टिनोले योजना सार्वजनिक गर्दै अरुले पनि पछ्याउने खालको उदाहरणीय संस्था बनाउने प्रयासमा आफु लागिपरेको बताए । गत वर्ष भ्रष्टाचारकाण्डमा तत्कालिन अध्यक्ष सेप ब्लाटरसहित धेरै उच्च अधिकारी मुछिएपछि फिफाले सन् २०२६ सम्मको योजना सार्वजनिक गरेको हो ।
नयाँ योजनामा विश्व फुटबलको विकासमा लगानी बढाउने, महिला खेलाडीको संख्या बढाउने तथा फुटबलमा मानिसको सहभागितालाई वृद्धि गर्ने लक्ष्य समेत समेटिएको छ । विश्व जनसंख्याको ६० प्रतिशतलाई फुटबलमा सहभागी गराउने लक्ष्य पनि फिफाको छ । हाल यो संख्या ४५ प्रतिशत रहेको छ ।
फुटबलको विकास हुँदै गरेको क्षेत्रमा थप चार अर्ब अमेरिकी डलर लगानी गर्ने र महिला फुटबल खेलाडीको संख्या ६ करोड पु¥याउने लक्ष्य लिइएको छ ।
