१० असोज, काठमाडौं ।
सरकारले अफगानिस्तान र इराकमा बैदेशिक रोजगारीमा जान लगाइएको प्रतिबन्ध हटाउने तयारी गरेको छ ।
श्रम तथा रोजगारमन्त्री सूर्यमान गुरुङले प्रतिबन्ध हटाउनेबारे आगामी मन्त्रिपरिषदबाट निर्णय लिने सम्भावना रहेको जानकारी गराउनु भयो ।
रिपोर्टर्स क्लबमा आज आयोजित कार्यक्रममा बोल्दै मन्त्री गुरुङले नेपाली कामदारको सुरक्षाको प्रत्याभुति सहित दुवै देशमा कामदार पठाउने दबाब आएको दाबी गर्नुभयो ।
उहाले भन्नुभयो , अमेरिकी, बेलायत लगायतका देशका राजदूतहरुले भेटेर नै अफगानिस्तान र ईराकस्थित आफ्नो दूतावासहरुमा नेपाली कामदार पठाउन प्रधानमन्त्रीलाई दबाव दिएका छन् । कामदारहरुको सुुरक्षाको प्रत्याभुति गर्ने पनि उहाहरुको प्रतिबद्धता छ ।
यस्तै श्रममन्त्री गुरुङले म्यानपावर व्यावसायमा देखिएको विकृति हटाउन नयाँ कार्यक्रम ल्याउने पनि बताउनु भयो ।
मन्त्री गुरुङले फ्रि भिसा फ्रि टिकटको नाममा कसैले मोटो रकम लिएको थाहापाए कारवाही गर्ने पनि चेतावनी दिनुभयो ।
