काठमाण्डौ, १० असोज ।
उद्योगमन्त्री नविन्द्रराज जोशीले नेपाल औषधि लिमिटेडको सामान्य मर्मत पछि तत्काल आठ प्रकारका औषधि उत्पादन गर्न सक्ने दाबी गर्नुभएको छ ।
औषधि लिमिटेडको स्थलगत निरिक्षणका लागी पुग्नुभएका मन्त्री जोशीले सन्चारकर्मीसँग कुरा गर्दै सरकारले घोषणा गरेकै मितिमा औषधि उत्पादन सुरु हुने बताउनु भयो ।
सरकारी उद्योगहरु पुनः सुचारु गर्ने अभियानमा लाग्नुभएका उद्योगमन्त्री जोशीले उद्योगको निरीक्षण पछि लिमिडेटका पूर्वप्रमुख राजेन्द्र तुलाधरसँग पनि छलफल गर्नुभएको थियो ।
सो क्रममा तुलाधारले मन्त्री जोशीसामू कच्चा पदार्थ ल्याइदिए केहि दिनमै सिटामोलसहित अत्यावश्यक औषधि उत्पादन गर्न कुनै समस्या नरहेको बताउनुभयो ।
उहाले सिटामोल, जीवनजल, आइरन चक्की, एम्जिट, नेमोक्सिल, कफहिष्ट, कपनाश र आरडीजेड औषधि उत्पादन गर्ने मेसिनमा कुनै खराबी नरहेको जोशीलाई जानकारी गराउनु भएके थियो ।
तुलाधरले मन्त्री जोशीलाई राजनीतिक हस्तक्षेपका कारण २०६७ सालदेखि बन्द भएको सो उद्योगमा रहेको सबै मेसिनबाट औषधि उत्पादन गरेर समेत देखाउनु भएको थियो ।
