काठमाडौ २० भदौ ।
मानव बेचबिखन विरुद्धको दशौं राष्ट्रिय दिवस आज बिभिन्न जनचेतनामुलक कार्यक्रम गरी मनाइदैछ । दिवसको यस वर्षको नारा एउटै लक्ष एउटै सार, मानव बेचबिखनको अन्त्य हाम्रो साझा सरोकार भन्ने तय गरिएको छ ।
सन् २००२ मा सम्पन्न सार्कको ११ औं शिखर सम्मेलनबाट पारित यौन शोषणको लागि महिला तथा बालबालिका बेचबिखन विरुद्धको सार्क महासन्धिलाई २०६३ भदौ २० गते संसदले अनुमोदन गरेको दिनको सम्झनामा यो दिवस मनाउन शुरु गरिएको हो ।
नेपालबाट बर्षेनी हजारौ युवायुवती रोजगार तथा अन्य बहानामा खाडी तथा भारतीय भुमिमा बेचबिखनमा पर्दै आएका छन् ।
यसैबीच दिवसका अवसरमा शुभकामना दिँदै प्रधानमन्त्री पुष्पकमल दाहालले मानव बेचबिखन एक जघन्य सामाजिक अपराध भएको भन्दै यसको रोकथामका लागी सरकार प्रयासरत रहेको बताउनु भएको छ ।
उहाँले सामाजिक अपराध विरुद्ध ऐक्यबद्धता जनाउदै मानव बेचबिखन रोक्न सबैले आ–आफ्नो क्षेत्रबाट सहयोग पुर्याउन अपिल समेत गर्नुभएको छ ।
