काठमाडौ १७ भदौ । वयवस्थापिका संसदको अन्तर्राष्ट्रिय सम्बन्ध तथा श्रम समितिले नेपालको संविधान, संयुक्त राष्ट्र संघको बडापत्र र पञ्चशीलको सिद्धान्तका आधारमा छिमेकी मुलुकसँगको कूटनीतिक सम्बन्ध सुमधुर र सुदृढ तुल्याउन सरकारलाई निर्देशन दिएको छ ।
सिंहदरबारमा आज बसेको समितिको बैठकले छिमेकी मुलुकसँग सम्बन्ध थप सुदृढ र सुमधुर तुल्याउदा अन्तर्राष्ट्रिय मुल्य र मान्यतालाई पनि ध्यान दिन निर्देशन दिएको हो ।
प्रधानमन्त्री पुष्पकमल दाहालको नेतृत्वमा सरकार गठन भएपछि दुई उपप्रधानमन्त्रीलाई प्रधानमन्त्रीको विशेष दूतका रुपमा भारत र चीन पठाउनु पर्नाको कारण र पत्रमा उल्लेख भएको विषयवस्तुका बारेमा सरकारबाट जानकारी लिएपछि समितिको बैठकले यस्तो निर्देशन दिएको हो ।
बैठकमा उपप्रधान तथा गृहमन्त्री बिमलेन्द्र निधीले प्रधानमन्त्री पुष्पकमल दाहालले भारतीय प्रधानमन्त्री नरेन्द्र मोदीलाई लेखेको पत्रमा शंका नगर्न आग्रह गर्नुभएको छ ।
उहाँले वर्तमान सरकार छिमेकीसँग सम्बन्ध सुधार्न प्रयासरत रहेकाले अघिल्लो सरकार भन्दा बढी राष्ट्रवादी भएको दाबी समेत गर्नुभयो ।
प्रधानमन्त्रीको पत्रमा नेपालको राजनीतिक अवस्था र आफ्नो सरकारलाई शुभकामना दिएकोमा भारत सरकारलाई धन्यवाद व्यक्त लगायतका सामान्य बिषय मात्रै भएको निधीले जिकिर गर्नुभयो ।
आफ्नो भारत भ्रमणका क्रममा नेपालको संविधानको बिषयमा छलफल नगरेको उहाँको भनाई थियो । मन्त्री निधी प्रधानमन्त्री दाहालको बिशेष दूतको रुपमा गत भदौं २ गतेदेखि भारत भ्रमणमा जानु भएको थियो ।
सो क्रममा उहाँले प्रधानमन्त्री दाहालको पत्र भारतीय प्रधानमन्त्री मोदीलाई बुझाएपछि त्यो पत्र सार्वजनिक गर्नुपर्ने प्रतिपक्षी दलले माग गर्दै आएका छन् ।
