काठमाडौ १७ भदौ ।
उपप्रधान तथा गृहमन्त्री बिमलेन्द्र निधीले प्रधानमन्त्री पुष्पकमल दाहालले भारतीय प्रधानमन्त्री नरेन्द्र मोदीलाई लेखेको पत्रमा शंका नगर्न आग्रह गर्नुभएको छ ।
संसदको अन्तर्राष्ट्रिय सम्बन्ध तथा श्रम समितिको आजको बैठकमा बोल्दै उहाँले वर्तमान सरकार छिमेकीसँग सम्बन्ध सुधार्न प्रयासरत रहेकाले अघिल्लो सरकार भन्दा बढी राष्ट्रवादी समेत भएको दाबी गर्नुभयो ।
प्रधानमन्त्रीको पत्रमा नेपालको राजनीतिक अवस्था र आफ्नो सरकारलाई शुभकामना दिएकोमा भारत सरकारलाई धन्यवाद व्यक्त लगायतका सामान्य बिषय मात्रै भएको निधीले जिकिर गर्नुभयो ।
आफ्नो भारत भ्रमणका क्रममा नेपालको संविधानको बिषयमा छलफल नगरेको उहाँको भनाई थियो । मन्त्री निधी प्रधानमन्त्री दाहालको बिशेष दूतको रुपमा गत भदौं २ गतेदेखि भारत भ्रमणमा जानु भएको थियो ।
सो क्रममा उहाँले प्रधानमन्त्री दाहालको पत्र भारतीय प्रधानमन्त्री मोदीलाई बुझाएपछि त्यो पत्र सार्वजनिक गर्नुपर्ने प्रतिपक्षी दलले माग गर्दै आएका छन् ।
