काठमाडौ, १५ भदौ ।
प्रदेशको सिमांकनप्रति असन्तुष्ट थरुहट थारुवान संयुक्त संघर्ष समितिले आन्दोलनका कार्यक्रम घोषणा गरेको छ । राजधानीमा दुईदिनसम्म चलेको समितिको भेलाले एक महिना लामो आन्दोलनका नयाँ कार्यक्रम घोषणा गरेको हो ।
आफूहरुको १३ बुँदे माग पूरा गर्न सरकार संवेदनशी नभएको भन्दै समितिले आगामी असोज १४ गतेसम्मका लागि विभिन्न आन्दोलका कार्यक्रम घोषणा गरेको संयुक्त संघर्ष समितिका सदस्य किशोर कुमार विश्वासले जानकारी दिनुभयो ।
समितिले मधेश आन्दोलनको छानबिनका लागि गठित समिति आफूहरुलाई मान्य नहुने पनि जनाएको छ । घोषित कार्यक्रम अनुसार भदौ २४ गतेदेखि २९ गतेसम्म मेचीदेखि महाकालीसम्म जिल्ला भेला गर्ने कार्यक्रम तय भएको विश्वासले बताउनु भयो ।
यस्तै संविधान जारी भएको असोज ३ गते विभिन्न १० स्थानमा विरोध सभा गर्ने तथा असोज ७ गते थारु महिलाहरुले मनाउने जितिया पर्वलाई पनि आन्दोलनकै रुपमा मनाउने समितिले निर्णय गरेको छ ।
