काठमाडौ १० भदौ ।
प्रधानमन्त्री पुष्पकमल दाहाल र शिक्षण अस्पतालका वरिष्ठ चिकित्सक गोविन्द केसीबिच आज बिहान भेटवार्ता भएको छ । प्रधानमन्त्रीलाई भेट्न डा. केसी आज बिहानै बालुवाटार पुग्नु भएको थियो ।
सो क्रममा डा. केसीका मागबारे छलफल भएको प्रधानमन्त्रीको निजी सचिवालयले जनाएको छ । स्वास्थ्य क्षेत्रको बेथिती अन्त्यको माग गर्दै आन्दोलनमा रहेका प्रा.डा. गोविन्द केसीले आफ्ना मागहरुलाई गंभिरतापूर्वक लिईदिन प्रधानमन्त्री पुष्पकमल दाहाललाई आग्रह गर्नुभएको छ ।
प्रधानमन्त्री दाहाल र कांग्रेस सभापति शेरबहादुर देउवाको आग्रहमा आफूले पछिल्लो अनसन तोडेकाले माग सम्बोधनका लागि बर्तमान सत्तागठबन्धन गंभिर बन्नु पर्ने डा केसीको भनाई थियो ।
जवाफमा प्रधानमन्त्री दाहालले डा. केसीको मागमा सरकार गंभिर रहेको बताउदै माग र मुद्दाबारे थप अध्ययन गरेर प्रक्रिया अगाडि बढाउने प्रतिवद्धता जनाउनु भएको छ । सरकारसँग भएका सम्झौता कार्यान्वयन नभएको भन्दै डा. केसीले आन्दोलन गर्दै आउनु भएको छ ।
उहाँले गएको साउन २९ गते पनि प्रधानमन्त्री दाहालसँग भेट गरी सरकारसँग भएका आफ्ना सम्झौता र संसदमा दर्ता भएको चिकित्सा शिक्षा ऐनमा संशोधन गर्नुपर्ने माग समेटिएको ६ बुँदे मागपत्र बुझाउनुभएको थियो ।
डा. केसीले शिक्षा ऐनमा संशोधन गरिनुपर्ने, पाँच वर्षभित्र सरकारी शिक्षण संस्थामा मेडिकल स्नातकोत्तर (पिजी) ७५ प्रतिशत निःशुल्क हुनुपर्ने, काठमाडौँ उपत्यकामा १० वर्षभित्र नयाँ मेडिकल कलेजलाई सम्बन्धन दिन नहुने लगायतका माग अघि सार्दै आउनु भएको छ ।
