काठमाडौ, २६ साउन ।
प्रधानमन्त्री पुष्पकमल दाहालले दैनिक उपभोग्य बस्तुको सहज तथा गुणस्तरीय आपूर्तिका साथै महंगी नियन्त्रणका लागि बर्तमान सरकार गंभिर रहेको बताउनु भएको छ ।
वालुवाटारस्थित प्रधानमन्त्री निवासमा आज बिहान सञ्चारकर्मीको टोलीसँग कुरा गर्दै उहाँले महंगी, कालोबजारी र अनियन्त्रित बजार अनुमगन गर्न मातहतका निकायलाई निर्देशन दिइसकेको बताउनु भयो ।
नाकाबन्दी तथा मधेश आन्दोलन अन्त्य भएको ६ महिना बितिसक्दा पनि बजार सहज हुन नसकेपछि प्रभावकारी अनुगमनका साथै जनतालाई तत्काल राहत पुग्ने गरी काम गर्न मातहत निकायलाई निर्देशन दिएको उहाँले बताउनुभयो ।
प्रधानमन्त्रीले आर्थिक विकास र समृद्धिका लागि तात्कालीन, मध्यकालीन र दीर्घकालीन योजना बनाएर अघि बढ्ने गृहकार्य गरिरहेको समेत बताउनु भएको छ । चुनौतिपूर्ण बर्तमान अवस्थामा संविधान कार्यान्वयनसँगै आन्तरिक राष्ट्रिय एकता सुदृढ गर्नु आफ्नो मूख्य योजना रहेको प्रधानमन्त्रीको भनाई थियो ।
आन्तरिक राष्ट्रिय एकता सुदृढ गर्दै सहमतिको वातावरण निर्माण गरी संविधान कार्यान्वयन, समयमै चुनाव सम्पन्न गर्ने र पूनर्निर्माणको कामलाई तिब्रता दिने उहाँको प्रतिबद्धता थियो ।
