काठमाडौं, साउन २४।
नेविसंघको ११ औं महाधिवेशन अन्तर्गत आजदेखि सुरु हुने भनिएको बन्दसत्र भोली सम्मका लागि स्थगित भएको छ ।
प्रतिनिधि विवाद मिल्न नसकेपछि भोली दिउँसो २ बजेसम्मका लागि बन्द सत्र स्थगित गरिएको नेविसंघका प्रवक्ता युपी लामिछानेले जानकारी दिनुभयो ।
११ जिल्लामा देखिएको प्रतिनिधि विवाद मिलाउन पार्टी नेतृत्वले समेत प्रयास गरेपनि सफल हुन सकेको छैन । भोलीसम्म विवाद मिल्ने लामिछानेले दाबी गर्नुभयो । यसअघि पटकपटक स्थगित हुँदै आएको नेविसंघको महाधिवेशन हिजो देखि सुरु भएको हो ।
कांग्रेस सभापति शेरबहादुर देउवा, नेता रामचन्द्र पौडेल, कृष्णप्रसाद सिटौला र खुमबहादुर खड्काले आफू नजिकका विद्यार्थी नेतालाई अध्यक्ष उठाउने तयारी गरेका छन् ।
देउवा पक्षबाट नैनसिंह महर र जितजंग बस्नेत, पौडेल पक्षबाट क्षितिज भण्डारी, मनोजमणि आचार्य, नीलकण्ठ रिजाल, आनन्द त्रिपाठी र दीपक भट्टराई, सिटौला पक्षबाट कुन्दन काफ्ले र खड्का पक्षबाट शुभराम बस्नेत अध्यक्षमा उठ्ने चर्चा छ ।
उम्मेदवारी दिने बेलासम्म देउवा पक्षले खड्का र सिटौला पक्षधरलाई मिलाएर आफ्नो तर्फबाट एक मात्र उम्मेदवारी दिने तयारी गरेको छ ।
