काठमाडौं, साउन १७ । मुलुकका बिभिन्न स्थानमा अँएको बाढी पहिरोमा परी साउन महिनामा एक सय २ जनाको मृत्यु भएको छ ।
उपप्रधान, रक्षा एवं गृहमन्त्री भीमबहादुर रावलले व्यवस्थापिका–संसदको आजको बैठकमा बोल्दै यही साउन १० गतेयता देशका विभिन्न स्थानमा बाढी–पहिरो र डुबानका कारण १ सय २ जनाको मृत्यु जानकारी दिनुभयो ।
देशका ४३ ओटा जिल्लाम बाढी, पहिरो र डुबानका कारण १ सय २ जनाको मृत्यु भएको, २२ बेपत्ता र ५८ जना घाइते भएको उहाले बताउनु भयो ।
तत्काल उद्धार, खोजी, र राहतका लागि विभिन्न मन्त्रालय, सुरक्षा निकाय, जिल्लास्थित प्रशासनिक कार्यालय परिचालित भएको भन्दै उनले रकम अभाव भएमा वा कुनै समस्या भएमा तत्काल खबर गर्न निर्देशन दिइएको पनि बताउनु भयो ।
मन्त्री रावलले केन्द्रीय दैवीप्रकोप उद्धार समितिको साउन १३ गतेको बैठकबाट खाद्यान्न, लत्ताकपडा, भाँडाकुडा, औषधिलगायत सामग्री तत्काल पु¥याउन निर्देशन दिइएको, ७५ करोड थप रकमको शोधभर्नाका लागि निकासा गर्ने निर्णय भएको पनि जानकारी दिनु भयो ।
बैठकमा सांसदहरुले राखेका जिज्ञासाको जवाफ दिंदै उहाले सप्तरीको तिलाठीस्थित सीमावर्ती नदीको बाँध भत्केपछि दुबैतर्फका जनता भेला भएको र त्यसक्रममा झडप हुँदा नेपाली नागरिक देवनारायण यादवलगायत घाइते भएको जानकारी दिनु भयो ।
