काठमाडौ १७ साउन ।
सहमतीय सरकार गठनको प्रयास असफल भएपछि आजबाट बहुतीय आधारमा प्रधानमन्त्री चयनको प्रक्रिया सुरु हुदैछ ।
राष्ट्रपति विद्यादेवी भण्डारीले सहमतिय सरकार गठनका लागि दिनुभएको एक साताको समय हिजो सकिएपछि आजबाट प्रधानमन्त्री चयनको लागि बहुमतीय प्रक्रिया सुरु हुने भएको हो ।
आज बस्ने संसद बैठक अघि नै राष्ट्रपतिले बहुमतीय आधारमा प्रधानमन्त्री चयनको लागि आह्वान गर्ने र संसदमा पत्र पठाउने तयारी छ । संसद बैठक अपरान्न ३ बजेका लागि बोलाइएको छ ।
राष्ट्रपति कार्यालयबाट पत्र प्राप्त भएपछि सभामुख ओनसरी घर्तीले यसबारे जानकारी सदनलाई गराएर संसद् सचिवालयका महासचिव मनोहरप्रसाद भट्टराईलाई निर्वाचन अधिकृत तोक्नु हुनेछ ।
त्यसपछि प्रधानमन्त्री निर्वाचनको लागि आवश्यक प्रक्रिया अगाडि बढ्ने संसद् सचिवालयका सहायक प्रवक्ता सुदर्शन कुइँकेलले जानकारी दिनुभयो ।
राष्ट्रपति कार्यालयबाट पत्र प्राप्त भएपछि सचिवालयले प्रधानमन्त्रीको उम्मेदवारी दर्ता लगायत निर्वाचन तालिका सार्वजनिक गर्नेछ ।
