काठमाडौ १६ साउन ।
पूर्व प्रधानमन्त्री एवम् नयाँ शक्ती नेपालका संयोजक डा. बाबुराम भट्टराइले नेपालको सत्ता परिवर्तनमा भारत र राजाको भूमिकाबारे अनावश्यक चर्चा हुने गरेको टिप्पणी गर्नुभएको छ ।
नेपाल पत्रकार महासंघले आज घोराहीमा आयोजना गरेको पत्रकार भेटघाटमा बोल्दै उहाले यस्तो बताउनु भएको हो । नेपालको सत्ता परिवर्तनमा सँधै भारत र राजालाई भूतका रुपमा हेर्ने गलत प्रवृत्ती रहेको भट्टाराईको भनाई छ ।
सत्ता परिवर्तन नेपालकै राजनीतिक दल र शासकीय प्रणालीका कमजोरीका कारण हुने गरेको भन्दै उहाँले नेपाली जनताको त्याग र बलिदानलाई बिर्सिएर हरेक घटनामा भारतको नाम जोड्नु उचित नहुने धारणा राख्नुभयो ।
नेपालका हरेक परिवर्तन र उपलब्धीमा नेपाली जनताकै हात रहेको उहाले बताउनु भयो । उहाँले मुलुकमा प्रत्यक्ष निर्वाचित राष्ट्रपति नहुँदासम्म राजनीतिक अस्थिरता कायम रहने भन्दै शासकीय प्रणालीमा परिवर्तन भएपछि मात्र देशमा स्थिरता कायम हुने जिकिर गर्नुभयो ।
