१३ साउन, काठमाडौं ।
नेकपा माओवादी केन्द्रले पार्टीका तर्फबाट सरकारमा सहभागी हुने मन्त्रीहरु छनौटका लागि मापदण्ड बनाएको छ ।
माओवादी हेडक्वाटर केन्द्रको आज बसेको बैठकले मन्त्री छनौटका लागि मापदण्ड तय गरेको हो । मन्त्रीको आकांक्षी बढेपछि माओवादीले मापदण्ड बनाएको भएपनि त्यसलाई सार्वजनिक गरिएको छैन ।
काम गर्न सक्ने क्षमता भएकाहरुलाई समानुपातिक र समावेशी प्रतिनिधित्व मिलाएर मन्त्री बनाउने निर्णय भएको तर, व्यक्तिका बारेमा भने टुंगोमा पुग्न बाँकी रहेको पार्टी प्रवक्ता पम्फा भुसालले जानकारी दिनुभयो ।
नेकपा एमाले नेतृत्वका सरकारमा सहभागी भएकाहरु पनि नयाँ सरकारमा मन्त्री हुन इच्छुक देखिएपछि माओवादी केन्द्रमा मन्त्री छनौटको काम जटिल बनेको जनाईएके छ । प्रवक्ता भुसालले मापदण्ड तय भइसकेकाले अब मन्त्री छनोट गर्न समस्या नहुने भन्दै फेरि बैठक बसेर मन्त्री बन्नेको नाम टुंगो लगाउने दाबी गर्नुभयो ।
सचिवालयको बैठकमा सरकारको प्राथमिकताका विषयमा समेत छलफल भएको छ । भूकम्पबाट क्षतिग्रस्त संरचनाहरुको पुनर्निर्माण, संविधानमा व्यवस्था गरिएका स्थानीय, प्रदेश र संघीय तहको निर्वाचन, असन्तुष्ट पक्षका माग सम्बोधन, उर्जा संकट लगायतका विषयलाई नयाँ सरकारले प्राथमिकता दिने माओवादी केन्द्रको निर्णय छ ।
