१३ साउन, काठमाडौं ।
मधेसी मोर्चासहितको संघीय गठवन्धनले स्थानीय तह पुनर्संरचना आयोगको काम रोक्न माग गरेको छ ।
संघीय समाजवादी फोरमको कार्यालयमा आज बसेको गठवन्धनको बैठकले आफूहरु प्रादेशिक सीमांकनसहितका विषयलाई लिएर आन्दोलनमा रहेको भन्दै अहिले नै स्थानीय तहको पुनर्संरचना गर्नु उपयुक्त नहुने बताएको छ ।
गठवन्धनले हतारमा आयोग गठन गरेर सरकारको नेतृत्व गरेको एमालेले संघीयतालाई विथोल्ने प्रयास गरेको आरोप समेत लगाएको छ ।
तर, सरकारको नेतृत्व गर्ने तयारी गरिरहेको माओवादीले बुधबार मात्र आयोग पुनर्गठनको प्रस्ताव अघि सारेको छ । कांग्रेसले पनि असन्तुष्टि जनाएको छ । कांग्रेसले प्रस्तावित ५६५ स्थानीय तहको संख्या पर्याप्त नभएको बताएको छ ।
यसैबीच संघीय गठवन्धनले सरकारमा जाने नजानेबारे अहिले निर्णय गर्न आवश्यक नभएको बताएको छ ।
सहमतीय सरकार गठनका लागि राष्ट्रपतिले दिएको समय कायमै रहेको र सरकार गठनको तयारीमा रहेका कांग्रेस र माओवादीले कुनै ठोस प्रस्ताव नल्याएको भन्दै बैठकले सरकारबारे कुनै निर्णय गरेन ।
मधेसी मोर्चासहितको गठवन्धनले बाढी प्रभावितहरुको उद्धार तथा राहतमा सरकारी प्रयास अपर्याप्त भएको बताएको छ ।
साथै बाढी प्रभावितहरुको राहत तथा उद्धारमा स्थानीय तह परिचालन गर्ने निर्णय समेत गरेको छ ।
