काठमाण्डौ ,११ साउन ।
व्यवस्थापिका संसदले राष्ट्रपतिबाट जारी भएको बाधा अड्काउ फुकाउ आदेश बहुमतले अनुमोदन गरेको छ ।
संविधानको धारा २९८ अनुसार निर्वा्चित प्रधानमन्त्रीले राजीनामा दिएपछि नयाँ सरकार गठनका लागि प्रष्ट व्यवस्था नभएको भन्दै सरकारले सिफारिस गरेपछि राष्ट्रपति विद्या भण्डारीले सोमबार अड्काउ फुकाउ आदेश जारी गर्नुभएको थियो । त्यसको भोलिपल्टै आज बाधा अड्काउ फुकाउ आदेश अनुमोदनका लागि संसदमा पेश भएको थियो ।
छलफलका क्रममा कांग्रेस नेताहरुले बाधा अड्काउ फुकाउ आदेश आवश्यक नभएको बताएका छन् । तर, राजनीतिक निकासका लागि अनुमोदन गर्ने भन्दै आलोचनात्मक समर्थन गर्ने उनीहरुको भनाई छ ।
छलफलमा उठेका प्रश्नहरुको प्रधानमन्त्रीको तर्फबाट कानुनमन्त्री अग्नि खरेलले जवाफ दिनुभएको थियो । उहाँले नयाँ सरकार बन्न सक्छ कि सक्दैन भन्ने अन्योलता अन्त्य गर्ने गरी सरकारले बाधा अड्काउ फुकाउको सिफारिस गरेको बताउनुभयो । संसदको बैठक यही साउन १७ गते दिउँसो तीन बजे बस्ने गरी स्थगित भएको छ ।
