काठमाडौं, साउन १० ।
राष्ट्रपति विद्यादेवी भण्डारीले प्रधानमन्त्री चयनका लागी आज बाधा अड्काउ फुकाउ आदेश जारी गर्नुभएको छ ।
राष्ट्रपति भण्डारीले मन्त्रिपरिषदको सिफारिसमा नयाँ सरकार गठनका लागि संविधानको धारा ३ सय ५ अनुसार बाधा अड्काउ फुकाउ आदेश जारी गरेको राष्ट्रपति कार्यालयका सहायक प्रवक्ता केशवप्रसाद घिमिरेद्वारा प्रेषित विज्ञप्तिमा उल्लेख छ ।
नेपालको संविधानमा अर्को प्रधानमन्त्री निर्वाचनको प्रक्रिया प्रारम्भ गर्न बाधा अड्काउ परेकाले संविधानको धारा २९८को उपधारा (२) वा (३) बमोजिमको प्रक्रिया अपनाइ अर्को प्रधानमन्त्रीको निर्वाचन गर्न सकिने गरी सो आदेश जारी गरिएको राष्ट्रपति कार्यालयले जनाएको छ ।
बाधा अड्काउ फुकाउ आदेश जारी भईसकेपछि अब नयाँ सरकार गठनको प्रक्रिया अघि बढाउन बाटो खुलेको छ । अब भोली बस्ने संसद बैठकबाट प्रधानमन्त्री चयनका लागी आदेश अनुमोदनको प्रक्रिया अघि बढाउने छ ।
विज्ञप्तिमा ‘नेपालको संविधानको धारा २९८ मा संक्रमणकालीन मन्त्रिपरिषदसम्बन्धी व्यवस्था रहेको, सोही व्यवस्थाबमोजिम संसदबाट वर्तमान प्रधानमन्त्री निर्वा्चित भएकोमा उहाले धारा २९८ को उपधारा (८) बमोजिम राजिनामा दिनुभएकोले अर्को प्रधानमन्त्री निर्वा्चित हुने स्पस्ट व्यवस्था उक्त धारामा नरहेका कारण अर्को प्रधानमन्त्री निर्वाचनको प्रक्रिया प्रारम्भ गर्न बाधा अड्काउ फुकाउ जारी गर्नुपरेको’ उल्लेख छ ।
राष्ट्रपतिबाट बाधा अड्काउ फुकाउ आदेश जारी भएसँगै सभामुखले संसद नियमावली अनुसार प्रधानमन्त्री निर्वाचनको कार्यतालिका प्रकाशन गरी मिति र समय तोक्ने व्यवस्था छ ।
यसरी सहमतीय सरकारका लागि आजै आह्वान भएमा अबको १० दिनभित्र मुलुकले नयाँ सरकार पाउनेछ ।
