काठमाडौ १० साउन ।
शप्तकोशी नदीमा पानीको बहाब बढेपछि सप्तरीको गोबरगाँडा गाउँ सम्पर्क बिहिन बनेको छ । नदीले चारैतिरबाट घेरिएको उक्त गाउँमा आवत जावत बन्द भएको छ ।
गाउँमा मोबाइल सम्पर्क समेत बिच्छेद भएको जिल्ला विकास समितिका सहजकर्ता सन्जय यादवले बताउनु भएको छ । दुई सय परिवारको बसोबास रहेको उक्त गाउँका एक सय ५० परिवार यसअघि नै अन्यत्र सरिसकेको यादवले बताउनु भयो ।
यसैबीच घर माथिबाट झरेको पहिरोका कारण ताप्लेजुङको नाल्बुमा चार घर परिवार विस्थापित भएका छन् । निरन्तरको वर्षाका कारण त्यस क्षेत्रमा अहिले पनि पहिरो झरिरहेको स्थानीयले बताएका छन् ।
नाल्बो ५ मा पहिरो झर्दा श्यामबहादुर सावा लिम्बु, समिर नाल्बो लिम्बु, सन्जमान सेरेङ चोम्वाङ लिम्बु र मनिहाङ सेरेङ चोम्वाङ लिम्बुको परिवार विस्थापित भएका हुन् ।
पहिरोले श्यामबहादुरको घर भत्काएको छ भने बाँकिको घर नजिकैबाट पहिरो गएकाले उनीहरु विस्थापित भएको जिल्ला प्रहरी कार्यालय ताप्लेजुङका प्रहरी प्रमुख रामबहादुर केसीले बताउनु भयो ।
