काठमाडौं, ४ साउन ।
नेपाली कांग्रेस केन्द्रीय समितिको बैठक आज बस्दैछ । पार्टी केन्द्रिय कार्यालय सानेपामा केहिबेरपछि सुरु हुने बैठकमा मुलुकको पछिल्लो राजनीतिक घटनाक्रमका विषयमा छलफल हुने बताइएको छ ।
नेकपा माओवादी केन्द्रसँग मिलेर सरकार गठन गर्ने सहमति गरेको कांग्रेसले थप रणनिति बनाउन बैठक बोलाइएको हो । वर्तमान सरकारविरुद्ध सदनमा पेश भएको अविश्वासको प्रस्ताव पारित गराउने विषयमा आजको बैठकमा छलफल हुने पार्टी केन्द्रीय सदस्य विमलेन्द्र निधिले जानकारी दिनुभयो ।
प्रधानमन्त्री केपी शर्मा ओली स्वभाविक रुपमा अल्पमतमा परेकाले संविधान कार्यान्वयनको नेतृत्व संसदको ठूलो दलका हैसियतले कांग्रेसले गर्ने विषयमा बैठकमा छलफल हुने जनाएको छ ।
बैठकमा भ्रातृसंस्थाको महाधिवेशनका सन्दर्भमा पनि छलफल हुने बताइएको छ । ‘नेपाल विद्यार्थी संघ र महिला संघको विधान संशोधन तथा नेपाल तरुण दल, नेपाल किसान संघ, नेपाल सांस्कृतिक संघलगायत भ्रातृसंस्थाको महाधिवेशनका विषयमा पनि बैठकमा छलफल हुने निधिले बताउनु भयो ।
पछिल्लो समयमा बढेको महँगी, कालोबजारी लगायतका समस्या समाधान गर्ने उपायका विषयमा पनि बैठकमा छलफल हुने कांग्रेसले जनाएको छ ।
