काठमाडौं ,३ साउन ।
प्रधानमन्त्री केपी ओलीले संवैधानिक अड्चन हटाएर मात्र नयाँ प्रधानमन्त्री चयनको प्रक्रिया अघि बढाउनुपर्ने अडान राख्नुभएको छ ।
वालुवाटारमा आज साझ भएको छलफलका क्रममा ओलीले नेपाली कंग्रेसका सभापति शेरवहादुर देउवा र माओवादी केन्द्रका अध्यक्ष पुष्पकमल दाहाललाई सदनमा पेश भएको बजेट सम्वन्धि विधेयक पारित नभई अविश्वासको प्रस्ताव समेत अघि बढ्न नसक्ने धारणा राख्नुभएको हो ।
ओलीले सहमतिका आधारमा प्रधानमन्त्रीको निर्वाचनका लागि संवैधानिक प्रवन्ध मिलाउनुपर्ने धारणा राख्नुभएको प्रधानमन्त्रीका प्रेस सहयोगी चेतन अधिकारीले बताउनु भयो ।
देउवा र दाहालले भने प्रधानमन्त्री ओलीलाई पदबाट राजिनामा दिन सुझाव दिनुभएको थियो । दुई नेताको आग्रहपछि ओलीले अविश्वास प्रस्ताव पेश भएको अवस्थामा राजिनामा दिन नसकिने अडान समेत राख्नुभएको बताईएको छ ।
ओलीले संसद बैठक स्थगित गर्ने सभामुख ओनसरी घर्तीको निर्णयमा पनि असन्तुष्टी जनाउनुभएको थियो ।
