३ श्रावण, ताप्लेजुङ । ताप्लेजुङ तापेथोक गाविसको घैयाबारी भीरबाट लामाटार, जौबारी, र हेकुले क्षेत्रमा पहिरो झरेपछि सोत्लिमाकी २८ वर्षीया मनिता राई बेपत्ता भएकी छिन् । बेपत्ता मनिताको अवस्था अज्ञात छ ।

तापेथोक ८ सोत्लिम्मा निवासी २८ वर्षीया मनिता राई बेपत्ता छिन भने हराएकी भनिएकी चन्द्र मायालाई तापेथोक र लेलेप प्रहरी चौकीबाट असई प्रदिप राईको नेतृत्वमा गएको प्रहरी टोली र स्थानीयले हिज मध्यान्न १२ बजे घटना स्थल पुगी उद्धार गरेको ताप्लेजुङका प्रमुख जिल्ला अधिकारी चक्रपाणि पाण्डेले जानकारी दिए ।

ताप्लेजुङको सदरमुकाम फुङलिङ बजारदेखि दुई दिनको पैदल दुरिमा रहेको लामाटार, जौबारी, र हेकुले क्षेत्रमा श्रावण १ गते बिहान पहिरो झरे लगत्तै श्रावण २ गते बिहान घटना स्थलमा प्रहरी र स्थानीय उद्धारका लागि खटिए पनि संचारको पहुँच नभएको कारण बेलुकी मात्र सम्पर्क भएका पनि प्रमुख जिल्ला अधिकारी पाण्डेले जानकारी दिए ।

पहिरो झरेको बेला मनिताकी श्रीमान छिमेकी गाविस लेलेपमा सामान किन्न गएका थिए भने, छोराछोरी मामाघर गएका थिए । सम्पर्क बिहिन मनिता घरमा एक्लै थिए ।

घटना स्थलका ७ घर परिवारका मानिस सुरक्षित रहेका छन् । पहिरो प्रभावित परिवारलाई खान, बस्नको खासै समस्या नभएको प्रजिअ पाण्डेले बताए । अहिलेसम्म बेपत्ता मनिताको अवस्था अज्ञात छ ।