काठमाडौ ३१ असार ।
व्यवस्थापिका संसदको बैठक आज बस्दैछ । बिहान ११ बजेपछि बस्ने बैठकमा बजेटसँग सम्बन्धित बाँकी रहेका विधेयक पारित गर्ने कार्यसुची रहेको संसद सचिवालयले जनाएको छ ।
गत बुधबार नै बाँकी विधेयक पारित गर्ने कार्यसुची रहेपनि प्रमुख प्रतिपक्षी नेपाली कांग्रेस र सरकारबाट बाहिरिएको नेकपा माओवादी केन्द्रले प्रधानमन्त्री केपी शर्मा ओलीको राजिनामा माग गरेपछि बैठक एजेन्डमा प्रवेश नगरी आजका लागि सारिएको थियो ।
संसदले विनियोजन विधेयक पारित गरेपनि बजेटसँग सम्बन्धित राष्ट्रिय ऋण उठाउने विधेयक र ऋण तथा जमानत विधेयक भने पारित हुन बाँकी छ ।
सरकरले आर्थिक वर्ष सुरु हुनु आगवै बजेट पारित गर्नेगरी बजेट संसदमा प्रस्तुत गरेपनि आजपनि बजेटसँग सम्बन्धित विधेयक पारित हुने सम्भावना कम छ । सरकारविरुद्ध अविश्वासको प्रस्ताव दर्ता गराएका कांग्रेस र माअोवादी केन्द्रले प्रधानमन्त्रीबाट राजिनामा नआएसम्म बाँकी विधेयक पारित हुन नदिने बताउदै आएका छन् ।
आजपनि प्रधानमन्त्रीबाट राजिनामा नआए आजबाट अविश्वासको प्रस्तावलाई प्रक्रियामा लैजान सभामुखको ध्यानाकर्षण गराइने कांग्रेसका मुख्य सचेतक चीनकाजी श्रेष्ठले बताउनु भयो ।
