काठमाण्डौ, २८ असार ।
नेपाली कांग्रेस केन्द्रीय कार्य समितिको बैठक भोली बस्ने भएको छ ।
सरकारको मुख्य घटक नेकपा माओवादी केन्द्रले सरकारलाई दिएको समर्थन फिर्ता लिएपछि विकसित राजनीतिक घटनाक्रमबारे छलफल गर्न भोली कांग्रेस केन्द्रीय कार्य समितिको बैठक बस्ने भएको हो ।
संसद भवन नयाँ बानेश्वरमा बिहान साढे आठ बजे बस्ने गरी केन्द्रीय कार्य समितिको बैठक बोलाइएको कांग्रेसका मुख्य सचिव कृष्ण पौडेलले जानकारी दिनुभयो ।
माओवादीले नयाँ सरकार गठनका लागि कांग्रेसले आफूलाई औपचारिक पत्र दिईसकेको दाबी गरिरहेका बेला कांग्रेसले नयाँ सरकारबारे आन्तरिक छलफल गर्न लागेको हो ।
माओवादीको दाबीबारे कांग्रेसले कुनै प्रतिक्रिया जनाएको छैन । बैठकले आफ्नो नेतृत्वमा सरकार गठन गर्न पहल गर्ने कि अरु दललाई समर्थन गर्ने भन्ने विषयमा निर्णय लिने एक केन्द्रीय सदस्यले जानकारी दिनुभयो ।
