काठमाण्डौ ,२६ असार ।
शिक्षण अस्पतालका प्रध्यापक डा. गोविन्द केसी चिकित्सा शिक्षा सुधारका लागि विभिन्न माग गर्दै आजबाट पुन: अनशन बस्नुभएको छ । डा. केसी अपरान्ह पौने ५ बजेदेखि अस्पताल परिसरमै अनसन बस्नुभएको हो ।
अनशन बस्नु अघि केसीले सरकार लगायत सम्बद्ध निकायसमक्ष चार बुँदे माग पूरा गर्न दिएको दुई साताको अल्टिमेटम हिजो सकिएको थियो ।
त्यसअघि प्रधानमन्त्री केपी शर्मा ओलीले वार्तामा नबस्न डा. केसीलाई आग्रह गर्नुभएको थियो । प्रधानमन्त्रीले वार्तामा बोलाएपछि बालुवाटारस्थित प्रधानमन्त्री निवास पुगेका डा. केसीका केही सहयोगीसँग प्रधानमन्त्री ओलीले अनशन नबस्न आग्रह गर्नुभएको थियो ।
डा. केसी यसअघि पनि ७ पटक अनशन बसिसक्नुभएको छ । सो क्रममा सरकारले चिकित्सा शिक्षा ऐन ल्याउने लिखित प्रतिबद्धता जनाएको थियो ।
डाक्टर केसीले सबै सरकारी मेडिकल शिक्षण संस्थाहरुको आर्थिक भार सरकारले बेहोर्दै सबै सिट नि:शुल्क गर्नुपर्ने, सबै प्रदेशमा कम्तिमा उउटा सरकारी मेडिकल कलेज पुर्याउनुपर्ने माग राख्नुभएको छ ।
यस्तै, काठमाडौं उपत्यकामा आगामी १० वर्षसम्म मेडिकल, डेन्टल र नर्सिङमा नयाँ सम्बन्धन नदिने र मनशायपत्र पाएकाको नवीकरण नगर्ने, माथेमा प्रतिवेदन विपरीत हाल काठमाडौमा खोल्ने भनेर प्रस्तावित प्रतिष्ठानसम्बन्धी संसदमा रहेको विचाराधीन विधेयक तत्काल फिर्ता हुनुपर्ने र विगतमा भएका सम्झौता पालना गर्नुपर्ने लगायत माग रहेका छन् ।
पछिल्लो पटक उहाँले अख्तियार दुरुपयोग अनुसन्धान आयोगका प्रमुख आयुक्त लोकमानसिंह कार्कीविरुद्ध महाअभियोग लगाउनुपर्ने माग समेत गर्दै आउनुभएको छ । यसैबीच, युवा नेताहरु गगन थापा, योगेश भट्टराई, विश्वप्रकाश शर्मा लगायतले पनि डां केसीको अनशनप्रति समर्थन जनाएका छन् ।
