काठमाडौ ,२६ असार ।
उपप्रधान तथा स्थानीय विकासमन्त्री कमल थापाले राजनीतिक दलहरुको सहमतिमा स्थानीय निकायको निर्वाचन हुने बताउनु भएको छ ।
मिडिया नेपालले आज चितवनमा आयोजना गरेको पत्रकार सम्मेलनमा बोल्दै उहाँले अहिलेकै अवस्थामा निर्वाचन गर्ने या राज्य पुनःसंरचनापछि गर्ने भन्ने विकल्पका लागि सरकार खुल्ला रहेको बताउनु भयो ।
सरकारले मङ्सिरमा स्थानीय निकायको निर्वाचनको घोषणा गरी आवश्यक बजेट विनियोजन गरिसकेको उल्लेख गर्दै उहाँले प्रतिपक्षी दलसहितको सहमतिमा निर्वाचनको मिति घोषणा गरिने धारणा राख्नुभयो ।
विपक्षी र अन्य दलहरुले अन्तरिम निर्वाचनको सट्टा राज्यको पुनःसंरचना गरी एकैपटक स्थानीय निकायको निर्वाचन गर्न उपयुक्त हुने धारणा ल्याएकाले सो सुझावलाई समेत मध्यनजर गरी सरकारले सहमतिमै निर्वाचन गर्ने उहाँको भनाई थियो ।
उपप्रधानमन्त्री थापाले स्थानीय निकाय पुनःसंरचना आयोगले फागुन मसान्तसम्मको कार्यावधि पाएपनि दलहरुको सुझावलाई मध्यनजर गर्दै भदौ महिनाभरिमा पुनःसंरचनाको प्रतिवेदन बुझाउन आयोगलाई अनुरोध समेत गरिएको जानकारी दिनुभयो ।
