काठमाडौ २६ असार ।
प्रधानन्यायाधीशका लागि प्रस्तावित सर्वाेच्च अदालतका वरिष्ठतम् न्यायाधीश सुशीला कार्कीको संसदीय सुनुवाइ आज हुदैछ । आज बस्ने संसदीय सुनुवाइ विशेष समितिको बैठकले प्रस्तावित प्रधानन्यायाधीश कार्कीका सम्बन्धमा सुनुवाई गर्नेछ ।
कार्की विरुद्ध परेको उजुरीमाथि बिहान छलफल गरी समितिले कार्कीलाई कार्यकक्षमा बोलाएर सुनुवाइ गर्ने समितिको सचिवालयले जनाएको छ । कार्की विरुद्ध समितिमा छ वटा उजुरी परेको छ ।
कार्की सम्मिलित इजलासले गरेको दुईवटा फैसला विवादास्पद रहेको भन्दै समितिमा उजुरी परेको छ । यस्तै विधिविज्ञान प्रयोगशालाले गरेको डीएनए परीक्षणलाई कार्की सम्मिलित इजलासले प्रमाणका रूपमा अस्वीकार गरी विवादास्पद फैसला गरेको उजुरीमा उल्लेख छ ।
यसैबगरी सर्वाेच्च अदालतका न्यायाधीश सिफारिसविरुद्ध परेको रिट निवेदनमाथि न्यायालयको गरिमामा आँच आउने गरी सर्वाेच्चको एउटै न्यायाधीशको इजलासमा तोकेको आरोप लगाउँदै कार्कीलाई प्रधानन्यायाधीशमा अनुमोदन नगर्न अर्काे उजुरीमा माग गरिएको छ ।
कार्कीविरुद्ध परेका उजुरीहरूका विषयमा समितिले आज बिहान सम्बन्धित उजुरीकर्तालाई बोलाएर छलफल गर्नेछ । त्यसपछि प्रस्तावित प्रधानन्यायाधीश कार्कीलाई बोलाएर संसदीय सुनुवाइ गर्ने र अनुमोदनका विषयमा निर्णय गर्ने सचिवालयले जनाएको छ ।
