काठमाण्डौ, २५ असार ।
अर्थमन्त्री विष्णु पौडेलले पूर्व घोषणा अनुसार नै सशस्त्र द्वन्द्वमा सहिद र वेपत्ता परिवारले राहत पाउने बताउनुभएको छ ।
व्यवस्थापिका संसदमा विनियोजन विधयेक माथिको छलफलमा सांसदहरुले उठाएका प्रश्नको आज जवाफ दिँदै अर्थमन्त्री पौडेलले शान्ति प्रक्रियाका बाँकी काम तत्काल पुरा गर्नु सबैको जिम्मेवारी भएको बताउनुभयो ।
सहिद र वेपत्ता परिवारलाई पूर्व घोषणा बमोजिम नै राहत प्रदान गरिने उहाँको भनाई छ । सत्तारुढ एमाले र माओवादीबीच भएको नौबुँदे सहमतिमा पनि पूर्व घोषणा बमोजिम राहत दिने उल्लेख छ । तर, बजेटमा प्रष्ट उल्लेख नभएपछि माओवादी असन्तुष्ट देखिएको थियो ।
प्रचण्ड नेतृत्वको सरकारले सशस्त्र द्वन्द्वमा सहिद र वेपत्ता परिवारलाई १० लाख दिने निर्णय गरेको थियो । पछि बाबुराम भट्टराई नेतृत्वको सरकारले त्यसमध्ये ५ लाखको तामाकोसीमा शेयर दिने बताए पनि अहिलेसम्म कार्यान्वयन भएको छैन ।
