काठमाडौं, २३ असार । भोटेकोशी ३५ वर्ष पछि आएको ठूलो बाढी केही कम भए पनि चीन तर्फको हिमताल फुटेको आशंका गरिएकाले सिन्धुपालचोकको जनजीवन अझै त्रसित छ ।
नदी किनारका बासीन्दाहरु सुरक्षित स्थानमा सरेर बस्न बाध्य छन् । चीन तिर हिमताल फुटेको आशंका गरिए पनि एकिन हुन सकेको छैन ।
बुधबार नदीमा बाढी आएपछि सिन्धुपाल्चोकको बाह्रबिसेदेखि तातोपानीसम्मको नदी किनाराका दर्जनौ घरहरु जोखिममा परेका छन् ।
बाढीले तातोपानी नाका समेत खतरामा पार्ने संभावना देखिएको छ ।
नदीले बाह्रबिसे–तातोपानी सडकखण्डमा पर्ने अरनिको राजमार्गको कोदारीमा ५० मिटर जति पक्की सडक बगाएको छ । जसले गर्दा सो क्षेत्रमा यातायात प्रभावित बनेको छ ।
२०७१ सालमा जुरे पहिरोका कारण विपत्तिमा परेको सिन्धुपालचोकका बासिन्दालाई २०७२ को भूकम्पले निकै ठूलो क्षति पुर्याएको थियो भने अहिले २०७३ को बाढीले थप समस्यामा पारेको छ ।
