राजविराज ,२२ असार ।
विघटित संविधानसभा सदस्य स्वर्गिय मोहम्मद सदरुल मियाँ हकको हत्या आरोपमा उनकी पत्नी र छोरीलाई जिल्ला अदालत राजविराजले जन्मकैदको फैसला गरेको छ ।
जिल्ला न्यायाधीश महेन्द्रप्रसाद पोखरेलको एकल इजलासले पत्नि ५२ वर्षीया नुरजहाँ खातुन र २१ वर्षीया रुबेदालरुबेदा खातुनलाई जन्मकैदको फैसला गरेको हो ।
साथै, मुख्य आरोपित सिरहा जिल्ला चतरी गाविस–६ घर भई लहान नगरपालिका–५ बस्ने ४० वर्षीय अब्दुल रउफलाई समेत सर्वस्वसहित जन्मकैद गरेको अदालतले जनाएको छ ।
सप्तरीको कल्याणपुर गाविस–२ निवासी ५५ वर्षीय हकको हत्या योजनाकार छोरी रुबेदा र रउफलाई २०७० जेठ २३ गते तथा नुरजहाँलाई २०७० जेठ २४ गते नेपाल प्रहरीको केन्द्रीय अनुसन्धान ब्युरोको विशेष टोलीले पक्राउ गरेको थियो ।
हत्याका मुख्य योजनाकार र संलग्न रुबेदाका प्रेमी भारतीय नागरिक भई लहान नपा–५ मा बसी झारफुकको काम गर्ने ३९ वर्षीय जमिरुल शेख र सिरहा चतरी गाविस–२ का ३४ वर्षीय एनुल शेख भने फरार रहेको प्रहरीले जनाएको छ ।
आमा नुरजहाँको सहमतीमा रुबेदा र जमिरले विवाह गरेपनि बाबु हकले स्वीकार नगरेकाले पत्नी नुरजहाँ, छोरी रुबेदा र छोरीका प्रेमी जमिरुलकै योजनामा हत्या भएको थियो ।
विसं २०७० जेठ ६ गते उनीहरुले राति पूर्व सभासद् हक सुतेको कल्यानपुर–२ स्थित हुमा आयल ट्रेडर्स पेट्रोल पम्पमा धारिलो हतियार प्रहार गरी हत्या गरेका थिए ।
