काठमाडौ २० असार ।
नेपाल भारत प्रबुद्ध समुह इपिजीको पहिलो बैठक आजबाट काठमाडौमा सुरु हुदैछ । राजधानीको एक पाचतारे होटलमा बिहान १० बजे उपप्रधान तथा परराष्ट्रमन्त्री कमल थापाले बैठकको उद्घाटन गर्नूहुनेछ ।
बैठकमा दुई देशबीच भएको सन्धी सम्झौता पुनरावलोकन तथा खरेज, अंग्रेज सरकारको पालामा भएका सुगौली सन्धी लगायतका विषयमा छलफल हुने बताइएको छ ।
नेपाल भारत शान्ति तथा मैत्री सन्धि लगायत द्धिपक्षीय सन्धि तथा सम्झौता पुनरावलोकन, अद्यावधिक र आवश्यक परे खारेज समेत गर्न दुवै देशका सरकारलाई सुझाव दिन उक्त समुहको गठन भएको हो ।
बैठकले समुहले आगामी दिनमा गर्ने कामको मोडालिटी तयार पर्ने नेपालका तर्फबाट प्रबुद्ध समुहका सदस्य एवम् एमाले सांसद डा. राजन भट्टाराईले जानकारी दिनुभयो । समितिले द्धिपक्षीय सहमति र सन्धिबारे दुई वर्षभित्रमा दुवै सरकारलाई प्रतिवेदन बुझाउने जनाएको छ ।
समुहमा नेपालका तर्फबाट सांसद भट्टाराईका साथै पूर्वराजदुत भेषबहादुर थापा, कानुनविद् सुर्यनाथ उपाध्याय र पूर्वमन्त्री निलाम्बर आचार्य हुनुहुन्छ भने भारतका तर्फबाट पूर्वराजदुत जयन्त प्रसाद, प्राध्यापकद्धय महेन्द्र लामा र भूवन उप्रती तथा भारतीय जनता पार्टीका नेता भगतसिंह कोसियारी सहभागी हुनुहुन्छ ।
पछिल्लो समय दुई देशबीचको राजनितिक सम्बन्धमा पूर्ण रुपमा सुधार आउन नसकिरहेका बेला बस्न लागेको बैठकले सम्बन्ध सुधारमा सहयोगी भूमिका खेल्ने अपेक्षा समेत गरिएको छ ।
