१६ असार, काठमाडौं ।
नेकपा माओवादी केन्द्रका नेता जनार्दन शर्मा ‘प्रभाकर’ले सरकारसँग भएका नौ बुँदे सहमति कार्यान्वयन नभए आगामी आर्थिक वर्षको बजेट पारित हुन नदिने चेतावनी दिनुभएको छ ।
रिपोर्टस क्लबले आज गरेको साक्षात्कारमा माओवादी केन्द्रका नेता प्रभाकरले सहमति कार्यान्वयनका लागि सरकारले चासो नदिएको भन्दै यस विषयमा पार्टी्भित्र गम्भिरतापूर्वक छलफल भइरहेको जानकारी दिनुभयो ।
एमाले र माओवादीबीच वैशाखको तेस्रो साता द्वन्द्वकालीन मुद्दा सत्यनिरुपण तथा मेलमिलाप आयोगको दायरामा ल्याउने लगायतका विषयमा ९ बुँदे सहमति भएको थियो । ति सहमतिहरु कार्यान्वयन नभएसम्म बजेट पारित गर्न नहुने लिखित प्रस्ताव प्रभाकरले पार्टी संसदीय दलमा राख्नुभएको छ ।
उहाले मधेसका मुद्दा सम्बोधन गरी संविधानको प्रभावकारी कार्यान्वयन गर्ने जिम्मेवारी अहिलेको सरकारले पूरा गर्न नसक्ने भन्दै राष्ट्रिय सहमतिको सरकारको विकल्प नभएको पनि बताउनु भयो ।
प्रभारकले राष्ट्रिय सहमतिको सरकार गठनका विषयमा माओवादी र प्रमुख प्रतिपक्षी कांग्रेसबीच अनौपचारीक छलफल चलिरहेको पनि बताउनु भयो ।
