काठमाडौ,असार १६।
नेकपा माओवादीले आज सिंहदरबार घेराउ गर्दै छन् । दिउँसो १ बजेबाट शुरु हुने घेराउ कार्यक्रममा सिंहदरबार छिर्ने नाकाहरुलाई ब्लक गर्ने रहेको उपत्यका ब्यूरोले जनाएको छ ।
सरकारले बिनाकारण आफ्ना नेता तथा कार्यकर्तालाई गिरफ्तार गरी झुठा मुद्दामा फसाउने काम गरेको भन्दै विरोध स्वरुप घेराउ गर्न लागिएको माओवादीले जनाएको छ ।
त्यस्तै देशमा मोलाउँदै गइरहेको कालोबजारी र महंगी, तस्कर, भ्रष्टाचारी माथि कारवाही गरिनुपर्ने साथै राज्यले देशभरबाट गिरफ्तार गरेका आफ्ना नेता कार्यकर्ताहरुको तत्काल रिहाईको माग गर्दै दबाब स्वरुप सिंहदरबार घेराउ गर्न लागेको माओवादीले जनाएको छ ।
एनसेलले राज्यलाई अर्बौं रुपैयाँ कर छलेको भन्दै कर तिराउन दबाब स्वरुप माओवादीको नेतृत्वमा गत जेठ २८ गतेयता एनसेलका देशभरका टावरहरुमाथि कारवाही स्वरुप क्षति पुर्याउने काम भएको थियो ।
सोही क्षति पुर्याउने कार्यमा संलग्न रहेको आशंका प्रहरीले देशभरबाट झण्डै डेढ दर्जन माओवादीका नेता तथा कार्यकर्तालाई गिरफ्तार गरी थुनामा राख्दै आइरहेको छ ।
