धनकुटा, असार १२।
उपप्रधान तथा परराष्ट्रमन्त्री कमल थापाले नेपालीको पहिचान गुम्ने गरी धर्म परिवर्तन गराउन सक्रिय समूहलाई कारबाही गर्ने बताउनु भएको छ ।
आज धनकुटामा पत्रकारसँग कुरा गर्दै उपप्रधान मन्त्री थापाले लोभ र लालच देखाएर धर्म परिवर्तन गराउने समूहलाई कानुनी प्रक्रिया बाट कारबाही गर्नु पर्ने बताउनु भएको हो ।
उपप्रधान मन्त्री थापाले हिन्दु धर्मको प्रचार गर्ने कार्य भने संविधानले दिएको अधिकार भएको दाबी गर्नुभयो ।
संविधानले सनातन धर्मको प्रचारप्रचार गर्न पाउने अधिकार दिएकाले नेपाली पहिचानको संरक्षण गर्न हिन्दुत्व जागरण अभियान सञ्चालन गर्नु परेको उहाँको भनाई छ ।
ठूला राजनीतिक दलका नेताले विदेशी नुनको सोझो गर्न धर्म निरपेक्षतामा सहमति जनाएको आरोप समेत लगाउनुभयो ।
आइतबार बिहान जिल्ला विकास समिति, धनकुटा नगरपालिका, पाख्रीबास नगरपालिकाको वित्तिय र भौतिक प्रगति सुन्दै मन्त्री थापाले गाविसमा गएको रकम र सामाजिक सुरक्षा रकमको दुरुपयोग रोक्नु पर्ने बताउनुभयो ।
