काठमाडौ ,११ असार ।
वर्षात् सुरु भएसँगै म्याग्दीको ग्रामीण भेगका बस्तीहरुमा पहिरोको जोखिम बढेको छ । कमजोर भू–बनोट, भूमिगत पानी र अव्यवस्थित तरीकाले खनिएको सडकको कारण जोखिम बढ्दै गएको हो ।
जिल्लाको अधिकांश गाविसका बस्ती पहिरोको जोखिममा रहेको जिल्ला भूसंरक्षण अधिृकत दिवाकर पौडेलले बताउनुभयो । यो वर्ष जिल्लाका करिब एक हजार दुई सय घरधुरी पहिरोको जोखिममा रहेको उहाँले बताउनु भयो ।
सबैभन्दा धेरै मुनाको दर गाउँका करिब एक सय ३० घरधुरी र ओखरबोटको जुगेपानीका एक सय घरधुरी पहिरोको उच्च जोखिममा रहेको जिल्ला भूसंरक्षण कार्यालयले जनाएको छ ।
पहिरो गएको क्षेत्रमा जिल्ला विकास समिति, भूसंरक्षण कार्यालय लगायत विभिन्न निकायले जोखिम न्यूनीकरणका लागि वृक्षारोपण, भलपानी तर्काउने, ग्याबिन भर्ने लगायतको काम गर्दै आएका छन् ।
कमजोर भूगोल र पर्याप्त बजेट नहुँदा पहिरो रोकथामको लागि बर्से्नि सञ्चालन हुने साना योजनाले हरेक वर्ष आउने बाढी पहिरोको जोखिमलाई न्यूनीकरण गर्न कठिनाइ भइरहेको छ ।
