काठमाण्डौ, १५ जेठ ।
सरकारले सरकारी कर्मचारीको तलब २५ प्रतिशत वृद्धि गरेको छ ।व्यवस्थापिका संसदमा बजेट भाषण गर्दै अर्थमन्त्री विष्णु पौडेलले निजामती कर्मचारीको तलब २५ प्रतिशत वृद्धि गर्ने घोषणा गरेका हुन् ।
सँगै सरकारले निजामती कर्मचारीलाई योगदानका आधारमा निवृत्तिभरणको व्यवस्था गर्ने समेत घोषणा गरेको छ । कर्मचारीलाई सक्षम बनाउने समेत सरकारले योजना ल्याउने भएको छ । सरकारले गत वर्षको बजेट भाषणमा कर्मचारीको तलब वृद्धि गर्न सकेको थिएन ।
अर्थमन्त्री पौडेलले सरकारी कर्मचारीको मनोबल उच्च राख्न तलब बढाइएको बताउनु भयो । उहाले महंगी भत्तालाई पनि निरन्तरता दिइने बताउनु भयो ।
यस्तै सरकारले वजेट मार्फत वृद्ध भत्ता १ हजार रुपैयाँ बढाएको छ । सरकारले यस अघिसम्म वृद्धहरुलाई दिँदै सामाजिक सुरक्षा भत्ता वापतको १ हजार रुपैयाँबाट बढाएर २ हजार रुपैयाँ बनाएको हो । गत वर्ष पनि सरकारले ५ सय रुपैयाँबाट बढाएर वृद्ध भत्ता १ हजार रुपैयाँ बनाएको थियो।
यसका लागि सरकारले ३२ अर्ब ५० करोड रुपैयाँ खर्च गर्ने भएको छ । यसरी पाइने भत्ता भने बैंक खाताबाट मात्र दिइनेछ । बैंक खाता निशुल्क खोल्न पाइनेछ ।
एकल महिला, वृद्ध र अल्पसङ्ख्यकलाई सो भत्ता प्रदान गरिँदै आएको थियो । ‘आफ्नो गाउँ आफँै बनाउँ’ कार्यक्रमको बजेट पनि दोब्बर बनाइएको छ । ती कार्यक्रमहरु विसं २०५२ मा नेकपा (एमाले) नेतृत्वको सरकारकै पालामा आएको थियो ।
यसैगरी, सांसद विकास कोषको रकम बढाइ रु तीन करोड पु¥याइएको छ । पत्रकारलाई सरकारी अस्पतालमा उपचारमा लाग्ने उपचार खर्चमा ५० प्रतिशत छुटको व्यवस्था गरिएको छ भने सांसदहरुका लागि घरभाडा वृद्धि गरिएको छ ।
