काठमाडौं २८ वैशाख ।
युवा गायक कर्म दोङ तामाङको नयाँ सांगीतिक एल्बम कर्म यसै साता दर्शक श्रोता माझ आउँदैछन् । अध्यायनका शिलशिलामा जापानमै बस्दै आएका कर्मले नजिकिदै गरेको बुद्ध जयन्तीको अवसर पारेर जापानमै एल्वम विमोचनको तयारी गरेको छ ।
एक दशकदेखि नेपाली संगीत क्षेत्रमा सक्रिय गायक कर्म यसै एल्बमको लागि जापानबाट नेपाल आएका थिए । काभ्रेपलाञ्चोक जिल्लाको ठूलो पर्सेल गाविसमा जन्मेका गायक कर्मको नयाँ एल्बम कर्ममा विभिन्न स्वाद र शैलीका ६ वटा गीत समावेश गरिएका छन् ।
जसमा उनको पहिलो पटक रेकर्ड भएको “गीत अतिको गर्मी वैशाखमा” बोलको पूरानो गीत पनि रहनेछ भने बाँकी सबै गीतहरु नयाँ गीत रहेका छन् । उनको यही एल्वममा समावेश सुनकोशी तरेर म आउँला बोलको गीत अहिले युट्युव लगायत श्रोता र दर्शकमाझ निकै चर्चित छ ।
यसको म्यूजिक भिडियो जापानमै छायांकन गरिएको हो । सानैदेखिको संगीतप्रतिको झुकाव उमेरसँगै झनै बढ्दै जाने गरेको कर्मको अनुभव छ । भन्छन् “अब त संगीत नै मेरो जीवन हो भन्ने लाग्न थालेको छ ।” “किनभने संगीत विनाको त म सेकेण्डको पनि कल्पना गर्न सक्दिनँ” ,उनी भन्छन् ।
यस्तै संगीत कर्मबाट श्रोता र दर्शकको मनमा बस्न चाहने उनको धोको पूरा हुँदैछ । थोपा मिडिया प्रालिले एल्वम कर्मको व्यवस्थापन गर्दैछ । चार वर्ष अघि अध्ययनको क्रममा जापान गएका उनी अहिले जापानमा रहेका नेपाली श्रोता दर्शकहरुको लागि स्थापित नाम बनिसकेका छन् ।
त्यसैले उनी बस्ने नागोया शहर मात्र नभइ राजधानी टोक्यो, फुकुओका र ओशाका जस्ता शहरहरुमा आयोजना हुने कार्यक्रमबाट समेत उनलाई अफर आउँने गरेका छन् । सम्भव भएसम्म ती कार्यक्रमहरुमा पुग्छन् कर्म । यसबीचमा उनले राजु लामा, रोज मोक्तान, विजय लामा, प्रमोद ढकाल लगायतका सांगितिक हस्तीहरुसँग समेत स्टेज शेयर गरिसकेका छन् ।
