भक्तपुर, २७ फागुन ।
भक्तपुर जिल्लाका किसानले कृषिमा सरकारले दिने अनुदान टाठोबाठोले मात्र प्राप्त गर्ने गरेको गुनासो गरेका छन् ।
युवा स्वरोजगारको नीति बने पनि अझै युवालाई कृषिमा आकर्षित बनाउन नसकेको सहभागीको गुनासो थियो । कार्यक्रममा बागेश्वरी–२ मा व्यावसायिक गोलभेँडा खेती गर्दै आउनुभएका लक्ष्मण कुँवरले सरकारी निकायबाट अनुगमन र निरीक्षण नभएको गुनासो गर्दै सरकारी निकायले समय समयमा आवश्यक प्राविधिक सहयोग उपलब्ध गराउन माग गर्नुभयो ।
“किसानलाई सरकारी अनुदान प्राप्त गर्न कागजी प्रक्रिया झन्झटिलो रहेको छ” उहाँले भन्नुभयो । नगरकोट नगरपालिका–३ ताथलीमा व्यावसायिक गाइपालन गर्दै आउनुभएका रुद्रबहादुर खड्काले उत्पादनको बजारीकरणमा समस्या भएको बताउँदै विचौलियाले मूल्यमा गर्ने चलखेलले उत्पादन गर्ने किसानको बदनाम हुने गरेको बताउनुभयो । समान मूल्य निर्धारणका लागि जिल्लामा सङ्कलन केन्द्रको आवश्यकता रहेको उहाँको भनाइ छ ।
कार्यक्रममा सहभागी चित्तपोलका कृष्णबहादुर कार्कीले जिल्लामा भण्डारणको समस्या भएको बताउनुभयो । “भण्डारणको अभावले किसानले आफ्नो उत्पादनको उचित मूल्य पाउन सकेका छैनन्, कुहिएर फाल्नुपर्ने अवस्था छ” उहाँले भन्नुभयो ।
कार्यक्रममा उठेका जिज्ञासा र गुनासोको जवाफ दिँदै जिल्ला कृषि कार्यालयका प्रमुख पूर्णा ढुङ्गानाले कार्यालयबाट समय समयमा किसानका व्यवसायको अनुगमन हुने आश्वासन दिनुभयो । अनुदानका लागि ऐनले व्यवस्था गरेको परिधि नाँघ्न नसक्ने बताउँदै उहाँले अनुदान व्यावसायिक खेती लक्षित भएको बताउनुभयो । कार्यक्रममा जिल्लाका विभिन्न ठाउँका करिब २०० किसानको सहभागिता रहेको थियो ।
