काठमाडौँ, १९ फागुन ।
सरकारले निरंकुश पञ्चायती शासनकोविरुद्ध संघर्षमा रहँदा विभिन्न समयमा तत्कालीन सत्ताबाट जीवनहरण गरिएकाको योगदानलाई कदर गर्दै २२ जनालाई सहिद घोषणा गर्ने निर्णय गरेको छ ।
आज सिहदरबारमा बसेको मन्त्रीपरिषद बैठकले डडेल्धुराका भीमदत्त पन्त ,धनुषाका दुर्गानन्द झा, गुल्मीका शमशेरबहादुर खत्री , झापाका रामनाथ दाहाल ,नेत्र घिमिरे, वीरेन राजवंशी, कृष्ण कुइँकेल, नारायणप्रसाद श्रेष्ठलाई सहिद घोषणा गरेको छ ।
यस्तै सहिद घोषणा हुनेमा सिन्धुलीका ऋषि देवकोटा ‘आजाद’ , ओखलढुगांका यज्ञबहादुर थापा, धनकुटाका भीमनारायण श्रेष्ठ , सिराहाका राम उपाध्याय , लक्ष्मण उपाध्याय , ओखलढुंगाका लीलानाथ दाहाल , खगेन्द्रराज दाहाल, गोकर्णबहादुर कार्की , इलामका रत्नकुमार वान्तवा, सिरहाका सूर्यनाथ यादव , ताप्लेजुङका हरि नेपाल , संखुवासभाका चन्द्रबहादुर पुरी र झापाका चन्द्र डाँगी रहेका छन ।
यसैगरी, टिम्बुरबोटे र छिन्ताङलगायतका स्थानमा मारिएकालाई सहिद घोषणा गर्ने सम्बन्धमा सुझाव दिन उपप्रधानमन्त्री तथा रक्षामन्त्री भीमबहादुर रावल, उपप्रधानमन्त्री तथा सहकारी विकासमन्त्री चित्रबहादुर केसी, गृहमन्त्री शक्तिबहादुर बस्नेत र सिँचाइमन्त्री उमेश यादव रहेको समिति गठन गरिएको सरकारका प्रबक्ता एबम सन्चारमन्त्री शेरधन राईले जानकारी दिनुभयो ।
