काठमाडौ १९ फागुन ।
विश्व वन्यजन्तु दिवसको अवसर पारेर चितवन राष्ट्रिय निकुञ्जबाट ल्याइएको एउटा गैँडा आज बर्दिया निकुञ्जमा स्थान्तरण गरिदैछ ।
आज एक विशेष कार्यक्रम गरेर वन मन्त्री अग्निप्रसाद सापकोटा, राष्ट्रिय निकुञ्ज तथा वन्यजन्तु संरक्षण विभागका महानिर्देशक फणिन्द्रराज खरेल लगायतको उपस्थितिमा गैँडा बबई उपत्यकामा छाडिने बर्दिया राष्ट्रिय निकुञ्जले जनाएको छ ।
सरकारको निर्णय अनुसार बर्दिया राष्ट्रिय निकुञ्जको बबई उपत्यकामा १५ वटा गैँडा स्थानान्तरण गरिने बर्दिया निकुञ्जका प्रमुख संरक्षण अधिकृत रमेश कुमार थापाले बताउनुभयो ।
चितवन राष्ट्रिय निकुञ्जबाट हिजो दिउँसो नियन्त्रणमा लिइएको गैँडा आज बिहान बर्दिया निकुञ्जको बबई उपत्यकामा छाड्ने तयारी भएको हो ।
बर्दिया निकुञ्जमा अहिले २९ गैँडा रहेको तथ्यांक छ । यसअघि पटकपटक गरी चितवन राष्ट्रिय निकुञ्जबाट ल्याइएका ७० गैँडा बबईमा र १३ गैँडा कर्णाली नदी तटिय क्षेत्रमा छाडिएको थियो ।
