काठमाडौ १२ फागुन ।
प्रधानमन्त्री केपी शर्मा ओली ६ दिने भारत भ्रमण पूरा गरी आज स्वदेश फर्किदै हुनुहुन्छ । भारत सरकारको औपचारिक निमन्त्रणामा ४६ सदस्यीय प्रतिनिधि मण्डलको नेतृत्व गर्दै उहाँ गत फागुन ७ गते भारत जानु भएको थियो ।
उहाँ आज राति ११ बजेपछि महाराष्ट्रको मुम्बइ हुदै स्वदेश फर्किने कार्यक्रम रहेको छ । प्रधानमन्त्री ओली नेतृत्वको टोली हिजो गुजरातको भुज हुदै मुम्बइ पुगेको छ ।
उहाँले आज त्यहाँका व्यापारिक घरनासँग अन्तरक्रिया गर्नुका साथै बलिउडका कलाकारसँग भेटघाट गर्नुहुने कार्यक्रम रहेको छ । नेपाली भ्रमण टोली स्वदेश फर्किनु अघि संयुक्त विज्ञप्ती निकाल्ने तयारी समेत भएको छ ।
आज बेलुकी मुम्बइमै पत्राकार सम्मेलन गरी संयुक्त विज्ञप्ती निकाल्ने तयारी भइरहेको प्रधानमन्त्रीका मुख्य सल्लाहकार विष्णु रिमालले जानकारी दिनुभयो । यद्यपी विज्ञप्तीको भाषाबारे भने अझै सहमति हुन बाँकी रहेको बताइएको छ ।
भारत भ्रमणका क्रममा प्रधानमन्त्री ओलीले भारतीय समकक्षी नरेन्द्र मोदी, राष्ट्रपति प्रणव मुखर्जी, विदेशमन्त्री सुष्मा स्वराज, राष्ट्रिय सुरक्षा परिषदका सल्लाहकार अजित डोबल लगायतका भारतीय उच्च पदाधिकारीसाग भेट गर्नु भएको छ ।
