काठमाडौँ ८ फागुन ।
मधेसी मोर्चाका शिर्ष नेताहरुका कारण मधेस आन्दोलन अधिकार प्राप्त नगरी समाप्त भएको एक कार्यक्रमका बक्ताहरुले बताएका छन् ।
शनिबार काठमाडौँको संवाद डबलीमा मधेसी जनता पार्टीको बुद्धिजीबि विभागले आयोजना गरेको ‘संविधान संशोधनले मधेसीको अधिकार सुनिश्चितता, सम्भावना र विकल्प’ विषयक अन्तरक्रिया कार्यक्रममा उनीहरुले सो कुरा बताए हुन् ।
देशभक्त संघीय जनवादी मोर्चाका अध्यक्ष तिलक परियारले भारतको सहयोगमा मधेसी जनताले अधिकार पाउँछन् भन्ने भ्रम छरेको भन्दै अधिकार मधेसीकै बलबुताले पाउने बताए । ‘स्वाघोषित शिर्ष नेता बनेकाहरुबाटै मधेस आन्दोलन सफलतामा पुग्न सकेको छैन’ अध्यक्ष परियारले भने ।
अधिकारको लागि लड्नेहरु कहिलै राष्ट्रघाती र विखण्डनकारी नहुँने भन्दै परियारले ‘नेपालमा ढाका टोपी र दौरा–सुरुवाल लगाउनेहरुबाटै राष्ट्रघात भएको छ, धोती लगाउँनेहरुले अहिलेसम्म राष्ट्रघात गरेका छैनन’ भने । उनले अहिलेका मधेसी मोर्चाका नेताहरुबाट भने खतरा रहेको बताए ।
पूर्वमन्त्री तथा नेकपा संयुक्तका अध्यक्ष गणेश साहले तीन पार्टीले मधेसीसँग छलफल नै गरी संविधान संशोधन गरेकाले समस्या समाधन नहुँने बताए । ‘शासक आन्दोलनकारीलाई अधिकार दिने भन्दापनि फुटाएर असफल बनाउँन लाग्छ अहिलेपनि फुटाएर आन्दोलन असफल बनाइएको छ’ साहको भनाई थियो ।
कार्यक्रममा डा. रामेश्वर सिंहले विखण्डनबाट मधेसको विकास नहँुने बताउँदै मधेसी विखण्डनको पक्षमा नरहेको बताए । कालोबजारीयालाई फाइदा पुग्ने गरी भारतले गरेको नाकाबन्दीले सबैभन्दा बढि मार मधेसीलाई परेको सिंहले विचार व्यक्त गरे ।
उनले अधिकार नपाएसम्म आन्दोलन जारी राख्नु पर्ने बताए । प्रा.डा. निरन्जन झाले संविधान संशोधन हात्तिको देखाउँने दात मात्र भएको भन्दै मधेसको समस्या समाधान नभएको बताए । त्यस्तै मोहमद अलीले मधेसी जनता नेपाली नागरिक भएपनि मधेसमा आगो लाग्दा र मानिस मर्दा समेत काठमाडौँले कुनै मतलब नराखेको बताए ।
अभिबक्ता रोषन झाले मधेसी मोर्चाले मधेसी जनतालाई धोका दिएको भन्दै नयाँशक्ति नआएसम्म मधेसीको अधिकार सुनिश्चित नहुँने बताए । मधेसी जनता पार्टीको बुद्धिजीवि विभागको संयोजक सियाराम साहले पटकपटक असफल भएको मधेस आन्दोलनको आफूहरुले नेतृत्व गर्ने बताए ।
