काठमाडौ ७ फागुन ।
प्रधानमन्त्री केपी शर्मा ओली ६ दिने भारत भ्रमणका लागि आज दिल्ली जाँदै हुनुहुन्छ ।
भारतीय समकक्षी नरेन्द्र मोदीको विशेष निमन्त्रणामा उहाँ ४६ सदस्यीय जम्बो टोलीको नेतृत्व गर्दै अपरान्न ३ बजे त्यसतर्फ प्रस्थान गर्न लाग्नु भएको हो ।
प्रजातन्त्र दिवसका अवसरमा राजधानीको सैनिकमन्चमा आयोजना हुने कार्यक्रममा सहभागी भएपछि प्रधानमन्त्री ओली नेपाल एयरलाइन्सको विमानबाट दिल्ली प्रस्थान गर्ने कार्यक्रम छ ।
दुई देशबीचको सम्बन्ध सुधारमा भ्रमण केन्द्रित हुने बताइएको छ । भारत बसाइमा ओलीले भारतीय राष्ट्रपति प्रणव मुखर्जी, भारतीय समकक्षी नरेन्द्र मोदी, भारतीय राजनीतिक दलका शीर्ष नेताहरु लगायतसँग भेटघाट गर्ने कार्यक्रम छ ।
प्रधानमन्त्री ओलीको भ्रमणका क्रममा भारतले उपलब्ध गराउने ७५० मिलियन डलर सहुलियतपूर्ण ऋण तथा भूकम्प पछिको पूनर्निर्माणका लागि दिने भनिएको एक अर्ब अमेरिकी डलर सहयोग सम्झौतामा हस्ताक्षर हुनेछ ।
यसैगरी ५ अबै बराबरको हुलाकी राजमार्ग पाँच लेनमा विस्तार गर्नेसम्बन्धी समझदारीपत्रमा समेत हस्ताक्षर हुने बताइएको छ । प्रधानमन्त्री ओली आगमी फागुन १२ गते स्वदेश फर्किने कार्यक्रम रहेको छ ।
