फागुन ४, काठमाडौं ।
नेपाल आयल निगमले हवाई इन्धनको मूल्य घटाएको छ । अन्तर्रा्ष्ट्रिय बजारमा कच्चा तेलको मूल्य घटेकाले सोही अनुसार मूल्य घटाएको निगमले जनाएको छ ।
हवाई इन्धन आन्तरिक उडानतर्फ प्रतिलिटर ५५ रुपैयाँ र अन्तर्रा्ष्ट्रिय उडानतर्फ प्रतिकिलो लिटर ५ सय ४९ डलर घटाएको निगमका निर्देशक मुकुन्द घिमिरेले जानकारी दिनुभयो । नयाँ मुल्य आज राति १२ बजेबाट लागु हुनेछ । नयाँ मूल्य लागु भएपछि हवाई इन्धन आन्तरिक उडानतर्फ प्रति लिटर १ सय ९ रुपैयाँ र अन्तर्रा्ष्ट्रिय उडानतर्फ प्रतिकिलो लिटर ९ सय ८१ डलर हुनेछ ।
निगमका अनुसार भारतीय आयल कर्पोरेसन आइओसीले फेब्रुअरी १५ मा पठाएको ईन्धनको मुल्यका आधारमा समायोजन गरिएको हो । सर्वसाधरणको दैनिक जीवनमा प्रयोग हुने पेट्रोल, डिजेल, मट्टितेल र खाना पकाउने ग्यासको मूल्यमा भने कुनै परिवर्तन गरिएको छैन । पेट्रोल, डिजेल, मट्टितेल र ग्यासको मूल्य समायोजनबारे पनि छलफल भइरहेको घिमिरेले जानकारी दिनुभयो ।
