काठमाडौं, २९ माघ ।
नेपाल आयल निगमले आजदेखि नियमित रुपमा सबै पेट्रोल पम्पबाट इन्धन वितरण गर्ने तयारी गरेको छ ।
मुख्य नाका रक्सौलबाट समेत आयात बढेपछि डिजेल र पेट्रोल नाकाबन्दी अघिकै अवस्थामा जस्तो वितरण गर्न लागिएको निगमका निर्देशक दीपक बरालले जानकारी दिनुभयो ।
चार पांग्रे गाडीले १५ लिटर र मोटरसाइकलले ५ लिटरका दरले मात्र पेट्रोल भर्न पाउनेछन् । डिजलका गाडीलाई भने सीमा तोकिएको छैन । एक हप्तापछि भने पेट्रोल पनि माग अनुसार नै उपलब्ध गराउने निगमको तयारी छ ।
निगमले आजदेखि दैनिक साढे ३ लाख लिटर पेट्रोल र साढे ४ लाख लिटर डिजेल काठमाडौं उपत्यकाका पम्पमा वितरण गर्ने भएको छ ।
यसअघि नाकाबन्दीका कारण पेट्रोलियमको आयात कम भएपछि काठमाडौंमा मागभन्दा निकै कम मात्र इन्धन वितरण हुँदै आएको थियो ।
निगमले क्रमशः पेट्रोलियम पदार्थ वितरण बढाउँदै लैजाने पनि जनाएको छ । ग्यास भने तत्कालका लागि आधा भरिएको सिलिन्डर नै वितरण हुने निगमका निर्देशक बरालले जानकारी दिनुभयो ।
