धनगढी, २२ माघ ।
सडक निर्माणको ठेक्का पाई समयमा काम सम्पन्न नगर्ने ठेकेदारलाई जनही रु छ लाखका दरले जरिवाना गरिएको छ ।
जिविस डोटीको ग्रामीण पहुँच कार्यक्रमअन्तर्गत सडक निर्माणका लागि ठेक्का पाएर पनि तोकिएको समयमा काम पूरा नगरेको पाइएपछि नियमानुसार चारवटा ठेक्काका ठेकेदारलाई जरिवाना गरिएको स्थानीय विकास अधिकारी वासुदेव रेग्मीले राससलाई बताउनुभयो ।
आर्थिक सार्वजनिक खरिद ऐन, २०६३ तथा नियमावलीमा समयमै काम नगर्ने ठेकेदारलाई जरिवाना गर्न पाउने अधिकार स्थानीय विकास अधिकारीलाई दिइएको छ । जरिवानामा पर्ने निर्माण कम्पनीका ठेकेदारको नाम भने उहाँले दिन चाहनु भएन ।
ठेक्का समयमा नै सम्पन्न गर्न आनाकानी गर्ने अर्का एक ठेकेदारमाथि अनुसन्धान भइरहेको छ । डोटीका विभिन्न क्षेत्रमा निर्माणका लागि विभिन्न ठेकेदारले पाएका पुराना ठेक्कापट्टालाई ‘जिरो‘ बनाउने काम थालेको रेग्मीले बताउनुभयो ।
जिल्लामा काम गर्ने गैरसरकारी संस्था प्रत्येकले अबदेखि एउटा सार्वजनिक शौचालय निर्माण गर्नुपर्ने नीति पनि ल्याउन लागिएको छ ।
यस्तै, बाँझो राखिएको जग्गामा अबदेखि मालपोत बढी लाग्ने व्यवस्थासमेत गर्नका लागि तयारी भइरहेको बताइएको बताउनुभयो ।
