काठमाडौं,१७ माघ ।
उच्चस्तरीय राजनीतिक संयन्त्रको बैठक बिना निष्कर्ष सकिएको छ । सरकार एकलौटी चलेको भन्दै एमाओबादीमा असन्तुष्टी बढेपछि अध्यक्ष पुष्पकमल दाहालको पहलकदमीमा बोलाइएको उच्चस्तरीय राजनीतिक संयन्त्रको बैठक बिना निष्कर्ष टुङगीएको हो ।
प्रधानमन्त्री ओलीको व्यस्तताको कारण बैठकमा कुनै निर्णय नभएको नेताहरुले बताएका छन । बैठकपछि संचारकर्मीसंग कुराकानी गर्दै उच्चस्तरीय राजनीतिक संयन्त्रका संयोजक एवम् एमाओवादी अध्यक्ष दाहालले बैठक साँझ ५ बजे बस्ने जानकारी दिनुभयो ।
साझ बस्ने बैठकमा सरकारको कामकारवाही, प्रधानमन्त्रीको भारत भ्रमण, मधेसी मोर्चाको जारी आन्दोलन र नाकाबन्दी लगायतका एजेण्डामा छलफल हुने बताइएको छ । हिजो प्रधानमन्त्री केपि ओली र एमाओवादी अध्यक्ष पुष्पकमल दाहालबीच छलफल भइ आज संयन्त्रको बैठक बस्ने सहमती भएको थियो ।
प्रधानमन्त्री ओलीले एकल निर्णयबाट सरकार चलाएको भन्दै एमाओवादीभित्र असन्तुष्टि बढेपछि अध्यक्ष दाहालले प्रधानन्त्रीसँग सो बिषयमा छलफल गर्नुभएको थियो । एमाओवादी अध्यक्ष दाहालको संयोजकत्वमा सत्ता साझेदार र सरकार समर्थित दलका नेताहरुको सहभागीतामा संयन्त्र गठन भए पनि लामो समयदेखि बैठक बस्न सकेको थिएन।
