काठमाडौँ, १६ माघ ।
राष्ट्रिय प्रजातन्त्र पार्टीका अध्यक्ष लोकेन्द्रबहादुर चन्दले मुलुकमा स्वतन्त्रता र जनतामा समानता कायम भए मात्र समाजमा दिगो शान्ति स्थापना हुने बताउनुभएको छ ।
मानव सेवा ट्रस्टले महात्मा गान्धीको ६८ औँ सहादत दिवसका अवसरमा आज यहाँ आयोजना गरेको ‘वर्तमान जगत्मा गान्धीको प्रासङ्गिकता’ विषयको गोष्ठीमा उहाँले गान्धी शान्ति तथा अहिंसाका आदर्शपुरुष भएको बताउँदै भ्रातृत्व र प्रेमबाट विश्वशान्ति कायम गर्न उहाँले देखाएको मार्ग अहिले पनि उत्तिकै सान्दर्भिक छ भन्नुभयो ।
पूर्वप्रधानमन्त्री चन्दले गान्धीले सधैँ सत्यका लागि आग्रह गर्ने हुँदा अङ्ग्रेजलाई भारतबाट भगाउन सत्याग्रह आन्दोलन गरेको बताउँदै असल नागरिक निर्माण गर्नका लागि साध्य र साधन दुवै असल चाहिनेमा जोड दिनुभयो ।
नेकपा (एमाले) का युवा नेता महेश बस्नेतले सरल व्यवहारका धनी गान्धीले शान्तिपूर्ण समाज निर्माण तथा मानवकल्याणका लागि देखाएको अहिंसा र मित्रताको आदर्शलाई सबैले अवलम्बन गर्नुपर्ने बताउनुभयो ।
